Getdi qışın ayazı,
Parladı kolxoz yazı.
Əridi dağlarda qar,
Bulanlıq sellər axar,
Yenə coşub Araz, Kür,
Sahilləri hey sökür.
Yaşıl geymiş dağ, dərə;
Yenə bizim ellərə
Quşlar qonaq gəlirlər.
Zəhmətdən dincəlirlər.
Bəzəndi boz yamaclar;
Kəkliklər, həm turaclar
Kollarda qaqqıldaşır,
Kənddə adam qaynaşır.
Hər yanda qaynayır iş,
Torpaqlar cana gəlmiş.
Traktorlar səslənir,
Qoyun, quzu bəslənir.
Bir yanda sürü, çoban,
Bir yanda bağça, bostan.
Bir yanda göy tarlalar
Dəniz tək dalğalanar.
Uğur olsun, gözəl yaz!
Səni sevməmək olmaz!
Açıldıqça şux güllər,
Fərəhlənir könüllər.
Xoş gəldin, kolxoz yazı!
Gətirdin şənlik sazı.

1949