Cavan-qoca

- Şəhri-məlumunuzun vəzü qərarı necədir?
- Həmdülillah, necə görmüşdüsə Nuh, oyləcədir!
- Yeni məktəb açılıbmı vətən övladı üçün?
- Az deyil Adəm açan mədrəsə əhfadı üçün!
- Oxuyurmu qəzetə şəhrinizin əhli təmam?
- Bəzi sarsaq oxumuşlar oxuyur, mən oxumam!
- Ölkənizdə açılıbdırmı qiraətxanə?
- Tazələr açmış idi, qoyduq onu viranə!
- Ac qarındaşlara infaq edilirmi, əmi can?
- Onu görməzmi xuda, el niyə versin ona nan?!
- Bivə övrətlərin əmri alınırmı nəzərə?
- Canı çıxsın, o da getsin yenə bir tazə ərə!
- İttihad əmrinə dair danışırsızmı barı?
- Danışır bir paramız, leyk boğazdan yuxarı!
- Sünniyü şiə təəssübləri ləğə oldumu ya?
- Nə dedin? Küfr danışdın! Cıraram ağzını ha!..
- Qabili-ərz sözüm yox, məni əfv et, gedirəm...
- Bəcəhənnəm ki, gedirsən, səni xud mən nedirəm?!
Buna bax, ağzına bax, surəti-idbarına bax!
Başının şapqasına, etdiyi göftarına bax!..