Gecə yatmaq zamanı çatmış idi,
Molla Nəsrəddin evdə yatmış idi.

Nagəhan küçədən ucaldı səda,
Burharay düşdü, qopdu bir qovğa.

Molla, çiynində yorğanı, dərhal
Küçəyə çıxdı müztərib-əhval.

Gördü bir yanda bir ağır dəstə,
Sanki minmiş adamlar üst-üstə.

İstədi dəstəyə tərəf getsin,
Bu yığıncaq nədir, - sual etsin.

İşbu əsnadə bir nəfər tərrar
Yorğanı qapdı nagəh, etdi fərar.

Molla bu qissədən pərişanhal
Evinə döncək övrət etdi sual:

“De görüm, küçədə nə var, a kişi?
Bu nə dəvadır, anladınmı işi?”

Dedi: “Yorğan üçün imiş bu təlaş,
Aldılar yorğanı, kəsildi səvaş”.