Soltan Mahmud Qəznəvi¹ bir qitə bağ saldırmışdı ki, rövzeyi-rizvan kimi dilguşa, firdövsi-bərin kimi behcətəfza idi. Bir gün öz atası Nasirəddini-Səbüktəkini o bağa dəvət elədi. Ənva və əqsam əkl və şürbdən sonra atasından soruşdu ki, ey pədəri-mehriban, səfheyi-aləmdə bundan dilguşa bağ olurmu?
   Nasiriəddövlə dedi ki, ey oğul, bu bir bağdır nəhayətdə ziba və qayətdə dilguşa. Amma ərkani-dövlət və mülazimani-həzrətdən hər bir kəs xahiş qılsa, bu bağın mislin tərtib edə bilər. Padşahlar gərək bir elə bağ salsınlar ki, sairlər onun mislin əmələ gətirməkdən aciz qalsınlar və onun meyvələri heç bostanda əmələ gəlməsin.
   Soltan ərz elədi ki, o hansı bağdır?
   Cavab verdi ki, o bağ baği-tərbiyət və nihali-mədələtdir ki, hükəma və şüəralardan abad ola. Ta o bağdan bir səmərə hasil ola ki, sərd və gərm, zimistan və tabistandan məsnun və məhfuz ola.
   Bu kəlam Soltan Mahmuda pəsəndidə gəldi.

¹Soltan Mahmud Qəznəvi (Səbuktəkin) - Qəznəvilər dövlətinin banisidir. O (997 - 1030), bir sıra ölkələri qarət edərək sarayına böyük sərvət toplamışdı. Firdövsi "Şahnamə"ni onun sifarişi ilə yazmışdır.