Dünya ədəbiyyatı tarixi çoxlu mütəfəkkir sənətkarlar tanıyır. Varlığın fəlsəfəsi üzərində dərin bir əzabla düşünən belə mütəfəkkir yazıçılar sırasında demokratik rus mədəniyyətinin nəhəng nümayəndəsi, böyük milli yazıçı Lev Tolstoy ən fəxri yerlərdən birini tutur. Həmişə həqiqətə çağıran yazıçının bütün qəhrəmanları insan həyatının mənası barədə düşünürlər.

Tolstoy həyata ehtiraslı bir məhəbbətlə, şərə və ədalətsizliyə qarşı dərin bir nifrətlə aşılanmış əsərlərində ümumbəşəri məsələlər qoyduğuna görə Asiya, Avropa, Amerika xalqlarının mənəvi-bədii mədəniyyətlərinə ciddi təsir göstərmişdir.

Bu kitaba dahi rus ədibin avtobioqrafik səciyyəli trilogiyası "Uşaqlıq", "İlk gənclik", "Gənclik" ilə yanaşı, "Kazaklar" və "Hacı Murad" povestləri də daxil edilmişdir.